6 di Mai 1976 "Il taramot in Friûl"

Un brut ricuart

O jeri sentât in cusine,  un pôc par fam,  un pôc par no savê ce fâ mi jeri metût a roseâ une croste di formadi, vecje e induride come il corean.

Mê mari jere cjapade a preparâ la cene, e jere tant impegnade, che no mi steve in scolte.

La pignate sul fûc cul  calôr e alçave il tapon ,e sborfant come un treno ,e  burive fûr tufs di vapôr, e dulintor si nulive, un bonodôr di mignestron.

Jenfri  chel bruntulâ de pignate, e il sclopetà des  faliscjis tal fûc o ai sintût un sunsûr, de bande dal barcon che al dave su le androne.  Tal imprin lizêr e lontan,

daspò, i claps dal mûr a an tacât a ticâsi, e ducj insieme, simpri plui fuart a bati. 

Mi pareve di sinti une vôs che diseve: << va fûr >> jerial il me sintiment, o jerial propit une vôs. No 'nd ai vût timp di pensâ, parsot le androne, simpri di chê bande, al jere rivât un rumôr, che intun moment,  al jere cressût cussì tant, che al centenave tal sintiment, e al spaurive il cûr.

Dûr e imbramît o stevi fer, fintremai che o 'nd ai capît:<< mame ! >> I ai  vosât,

 << lin fûr al è il taramot. >>

Lis gjambis spauridis, no volevin savê di cori, e  pareve che fossin incoladis tal pedrât.

Il madracat, che al remenave sot tiere, al moveve il curtîl, come lis ondis tal mâr.

Al pareve che sot de tiere e fos une bestie feroce, rabiose, e sameave che no volès cuietâsi, fintremai che dut nol fos sdrumât.

Ae fin si è fermât.

La int su la strade, cu la tremarele tes gjambis, e un grant pês intal cûr.

Ducj che si domandavin << Cui sa  dulà che al è stât ? Cui sa ce che al è sucedût ? >>

Plume di Ingjustri

Une gare di pescje

Une gare di pescje

Un pari cul frut

al prepare, la sere,

la cjane plui lungje,

chê plui lizere.

“Doman je la gare,

viôt te cassele,

controle,

sono ducj i ordegns?”

Aromai dut al è pront,

i ams, i viers

e ancje i plomps.

Intal doman di buinore,

a son li, dongje de aghe,

a son ducj in rie.

E scomence la gare.

Un al bute l’am dongje la rive.

Un altri al lance dulà

che la aghe si môf.

Un am  si imberdee

intor di chel di un compagn.

Un, rabiôs, al tontone

“culì, pes no 'nd è.”

Tun trat, un frut

si lu sint  a  vosâ.

“Cjapade! Cjapade!”

So pari lu clame.

“Spessee, spessee,

tirile sù,

ten ferme la cjane,

cjape la rêt,

sta  atent

che no scjampi.”

Di ogni bande

si sint svuatarâ

la trote che  sgurle

inte aghe,

ingrimpade intal am.

Chê biele gare,

chê biele pescjade,

no podarai smenteâ.

Inta la ment

par simpri mi restarà.

L’Emigrant

Cuant

che a mont

al va il soreli.

La jù in fonts

di Sant Zuan,

daûr chê gleseute.

Pari !

Di te mi impensi,

lât pal mont

emigrant.

Lontan

dal to paîs,

de tô cjase,

dai tiei fîs.

Cun in man

une valîs,

colme

plui di ricuarts

che di vistîts.

    Concorso nazionale di poesia in lingua italiana e friulana

                        <<  Le voci dell’anima >>

Poesia in lingua friulana---- I^classificata

 

Un tocut di paradîs             

Sot sere,                                                    

cuant che ancje le ultime spere di lûs,          

si sfante pierdude                                       

intun bati di alis di un gnotul,             

o rivi a cjalâmi tal spieli dal timp,       

cui voi di un frutin,                                              

che la maluserie de int                                

ancjemò nol veve fuscâts.                          

Mi viôt,                                            

intun tocut di paradîs,                                

ta chê cjase che e je tal mio cûr.                           

Un piçul cjanton di chest mont,                  

inte plane dal nestri Friûl.                                              

Mi viôt,                                                                                       

sul pedrât di une androne,                                    

che tantis voltis inte foghe dal zûc,   

tor di un clap mi soi çopedât.                     

O poiât,

sul grim de mame,                                      

tes lungjis gnots dal istât,                            

in scolte des flabis de none,                                 

strussiânt i voi, bramôs di sierâsi.      

E daspò,                                                   

sot de plete, insumiâmi di orcui e aganis,     

e cui pîts sgarfâ intai scus dal paion

a cirî un ripâr, une tane,                              

e fâmi plui piçul                                         

               par rivâ a platâmi. 

         

Un pezzetto di paradiso

Verso sera, / quando anche l’ultimo raggio di luce, / si dissolve perduto  /

in un battito d’ali di un pipistrello, /  riesco a guardarmi nello specchio del tempo, /

con gli occhi di un bambino, / che la malvagità della gente /ancora non aveva offuscati. / Mi

vedo, / in un pezzetto di paradiso, / in quella casa che è nel mio cuore /

Un piccolo angolo di questo mondo, / nella pianura del nostro Friuli. /

Mi vedo, / sul acciottolato di una androna, / che tante volte nella foga del gioco, /

addosso ad un sasso mi sono inciampato. / O appoggiato, / sul grembo della mamma,/

nelle lunghe notti dell’estate, / ad ascoltare le fiabe della nonna  / strofinando gli occhi  desiderosi di chiudersi. / E dopo / sotto le lenzuola, sognare orchi e agane, /

e coi piedi scavare tra le foglie del materasso / a cercare un riparo, una tana, /

e farmi più piccolo / per riuscire a nascondermi.

                                

     

   

          

Al nevee

Al nevee.

Planc a planc,

la nêf e cole,

lizere, lizere,

come une plume.

Une svintade

tun ricès le ingrume.

Dopo, l'aiar si ferme.

Flocs, come façolets,

vongolant

di ca e di là,

no san ce fâ,

colâ o no colâ.

Dopo al torne a soflâ,

al fâs dut un torteon

di flocs e polvarin.

A la fin si cuiete.

Planc a planc,

la nêf dut e plate.

La strade e je dute drete,

cence un fossâl.

Ator, dute une pâs.

Un altri mont al pâr.

                                 

                               

LIS CONTIS DI GNO NONO TONIN

 Gno Nono Tonin a Milan

< Fabio ti aio contât,di chê volte che o jeri lât a Milan in biciclete? >>

«No! Nono, no tu mi lu âs mai dit».

«Alore cumò ti conti; Tu âs di savê, che cuant che o jeri zovin, mi varès plasût une vore lâ indenant cui studis. La mestre Siacca, che mi à fat scuele tes elementârs, e veve cirût in dutis lis manieris di convinci gno pari, a paiâmi la iscrizion al Esam di stât, come privatist. A si tratave di 500 francs di chê volte. Ma nol è stât nuie di fâ, di rivâ a convincilu, lui al contindeve dome le sô idee, e cussì i a dit a la mestre “Siore mestre, a je ore che al impari un mistîr, no stâ dome a pierdi timp daûr aes monadis”. E cussì mi a mandât a imparâ il mistîr di marangon, là di Migjio Strissule.

«Jo o levi a lavorâ ogni dì malvulintîr, o vevi simpri la sperance di cjatâ un lavôr un tic di miôr. Cuant che o ai sintût che Jacum di Poç al sarès lât a Milan a cirî lavôr, no ai spietât nancje un moment, o soi partît di corse a domandâi se o podevi lâ vie ancje jo cun lui».

“Sa tu âs une biciclete e voie di pedalâ, par me a va benon, cussì o varès compagnie”.

In chê sere, dopo cheste rispueste di Jacum, jo o jeri, il plui content dal mont, e cul pinsîr o jeri bielzà a Milan.

«Daspò il probleme vêr, al jere chel di rivâ a convinci gno Barbe Meno a prestâmi le sô biciclete, soredut parcè che lui la tignive di cont come une relicuie.

Fabio, jo ti dîs la veretât, e je volude la man dal Signôr par rivâ a convincilu a dâmi le biciclete.

Mê mari, ogni dì che e passave, a man, a man, che si vicinave la ore de mê partence, a cresseve lis Ave Mariis ae Madone par avodâmi ae Sô protezion.

Lâ a Milan in biciclete inta chei agns, nol jere facil, lis bicicletis par ben tignudis che e fossin, no jerin di sigûr lis bicicletis lizeris che e son vuê, cence fevelâ des stradis, plenis di claps e di di busis. Nus a volût plui di une setemane par rivâ. Mangjâ pôc e pedalâ tant, e durmî indulà che si podeve. Par nestre fortune il cusin di Jacum, che al viveve a Milan nus à dât ospitalitât.Al jere une brave persone, e nol steve mâl nancje cul tacuin. Jo no pues dismenteâ il so boncûr, a pene che o sin rivâts, nus à subit fats jentrâ inte sô cjase,e nus a dât di mangjâ, e nus à metûts a durmî intune cjamarute sotet, mi pareve di jessi za un siôr. I prins doi dîs ju vin spindûts a cjalâ la citât.

«Denant dal Domo o jeri restât incantesemât, tal viodi chel spetacul di costruzion, ducj chei ricams su lis balaustris e chei sgherlifs tai penacui e ator ator dai balçons, e parevin fats cul trafôr,

e la sù adalt parsore di dut, chel sflandôr de Madonute di aur.

Jo no rivavi a movimi di li, o jeri come se o fos stât inclaudât inte strade, denant a chê maravee.

Dopo un pôc di timp che jerin a Milan, midiant des cognossincis che al veve il cusin di Jacum, jo ai cjatât di lâ a lavorâ come aprendist intune fabriche di automobii di gale, lis miôr di chê ete.

“La Isotta Fraschini”. Dilunc de zornade o levi a vore e la sere o fasevi un cors par deventâ un mecanic eletricist.

Dopo un an di sacrificis, o jeri sistemât a vonde ben. Jo 'nd ai di disi grazie fin che o campi al Signôr e al cusin di Jacum. Fabio cheste storie che ti ai contât, a son ducj fats di veretât, chest tal siguri jo».

di Plume di Ingjustri

publicât su <<Contecurte >>  il 12 di  Fevrâr

La  Cjase di Maghe Miute

        Un dì o soi rivât intun paisut,

          suntun puartelut e jere une scrite.

         << Cjase di Maghe Miute, >>

         <<  Se achi tu jentris, indaûr tal timp tu tornis . >>

          Jo curiôs o soi jentrât

          e intune androne scure mi soi cjatât,

          che di frut mi faseve tante pôre.

          Cjaminant sui claps dal pedrât

          intal curtîl o soi rivât,

         al jere plen di fruts e di lusôr,

          denant chel biel incjant, mi soi fermât,

          cul cûr in man mi cjali atôr.

          A man drete a son lis stalis,

          parsore cul fen ben intassât,a son lis tiezis.

          Plui indenant une cabiute,

          dentri cui cuninuts, je une blancje cuninute.

          Sot la linde je une cariole di len, dute carulide,

          cuntune ruede di fier, mieze rusinide,

          plui in  font intal curtîl, doi ledanârs.

          Tun trat si sint une rontade,

          lis rassis e lis gjalinis

          e svoletin scaturidis,

          un mus al salte fûr de stale,

          ronânt al tache a cori, si bute in tiere,

          si zire e si marcole al fâs dut un polvaron,

          al salte e al côr come un matuçut,

          dopo fat il so spetacul si cuiete,

          cuntune ultime rontade, al salude,

          e al torne dentri te sô stale.

          Une vecje si presente su la puarte,

          << Lui cui isal ? >> mi domande.

          Jo varès voie di rispuindi,

          che in chê cjase

          jo ai vivût il biel timp de zoventût,

          ma o resti ingherdeât,

          cence vôs e cence flât.

  

            \\